لوصفة دي كلها مميزات :
كل اللي بيحبوا البيتزا هتعجبهم الوصفة دي لأن طعمها مشابه جدا للبيتزا بس من غير تعب العجن و انتظار التخمير
كل اللي ما بيحبوش الخضار هيحبوه في الوصفة دي لأنه مش باين و متقدم بشكل مبتكر 
المافنز ده ينفع فطار، ينفع عشا، ينفع سناك أو في لانش بوكس الأطفال أو الكبار في الشغل
و حتى ينفع غدا جنب سلطة تونة أو طبق فول محترم (اه عادي ممكن نتغدي فول) 
الوصفة دي كمان مرنة جدا ؛ هي متكونة من جزئين : أساس المافن، و الحشو
الأساس ده مش هنلعب فيه
إنما الحشو ده ممكن نضيف و نبدل و نشيل و نحط زي ما نحب ، مالوش قواعد ثابتة 
آخر ميزة بأه اننا مش محتاجين مضرب و لا ادوات مخصوصة و لا حتى التزام بترتيب محدد لعمل أساس الوصفة
المقادير الأساسية
كوب و نصف دقيق
نصف كوب شوفان رقائق
معلقة صغيرة بيكنج باودر
بيضتين
معلقة كبيرة بدور الكتان (اختياري)
معلقة كبيرة زعتر
كوب لبن
نصف كوب زيت
ذرة ملح
نقلب المواد الجافة سوا، بعدها نحط عليها السوائل (زيت، بيض،لبن) و نقلب بالمعلقة
يدوب يمتزجوا، مش محتاجين عجن (عشان ما تنشفش)
الحشو
كوب جبنة شيدر مبشورة (أصفر و برتقالي)
نص كوب جبنة قريش مهروسة
*ليا ملحوظة هنا : ممكن تحطوا أي أنواع جبنة مبشورة أو طرية تحبوها المهم يكون مجموع الكمية كوب و نصف في الاخر)
يعني ممكن رومي، فلمنك، جودة، فيتا، موتزريلا، ريكفورد، حالومي، بري ……الخ
كوب جزر مبشور
نص كوب كوسة مبشورة
ربع كوب ذرة
ربع كوب فاصوليا حمراء
نصف كوب فلفل الوان
ربع كوب زيتون شرائح
ربع كوب سبانخ مقطعة
ده الحشو اللي انا استعملته على، بس لكم مطلق الحرية في التغيير و التبديل و الإلغاء
براحتكم تماما
كل اللي نعمله نقلب الحشو مع الأساس و نصبهم في قوالب الكب كيك أما بعد وضع ورق كب كيك أو ندهن القالب نفسه خليط زيت و زبدة
الخليط هيكون تقيل و مش بيعلى اوي في الفرن ، يعني املوا القوالب للآخر عادي مش ثلثين زي الكيك
No comments:
Post a Comment