مش لازم يتاكل في شم النسيم.. ممكن يتعمل من العجينة دي أحلى معجنات… هشة وطرية ولذيذة..
الطريقة والتكات
المقادير:
(نستخدم نفس الكوباية لعيار الدقيق واللبن والزبدة)
للخميرة:
معلقة كبيرة سكر
معلقة كبيرة خميرة
¾ كوب لبن دافي (من كمية اللبن اللي هتتحط في العجينة)
مقادير العجينة:
4 كوب دقيق
3/4 كوب سكر (ممكن أكتر حسب الرغبة في طعم السكر في العجينة)
3 بيضات
حوالي نص كوباية زبدة في درجة حرارة الغرفة (ممكن تزيد أو تقل شوية)
كوب ونص لبن دافي (اخدنا منه ¾ كوب للخميرة) (بس على حسب نوع الدقيق ممكن مانستخدمش الكمية كلها)
معلقة بيكينج باودر
رشة ملح
الطريقة:
نخلط الدقيق والسكر والبيكينج باودر والملح
وبعدين نخفق البيض ونضيفه للدقيق ونقلب كويس
وبعدين الزبدة ونفركها كويس مع الدقيق لغاية ما تتجانس
وبعدين نضيف الخميرة ونعجن
وبعدين اللبن نضيفه تدريجي لغاية ما العجينة تلم وتنعم وتكون مطاطية وسلسة
***ملحوظة: بلاش نزود دقيق علشان العجينة ماتنشفش.. كل ما نعجن أكتر كل ما العجينة تظبط وتنعم اكتر
نسيب العجينة تخمر في مكان دافي ويفضل مغطيها بكلينج فيلم وعليها فوطة
***ملحوظة: يُفضل تخميرها مرتين.. بعد ما تعلي أول مرة نطلع منها الهوا (نديها بالبوكس) ونسيبها تخمر تاني (حوالي ساعة أو اكتر مفيش مشكلة خالص)
بعد التخمير هنشكلها حسب الرغبة
وممكن تتحشي أو تكون سادة في الحالتين طعمها حلو جداً
انا عملت شوية سادة وشوية بحشوة السينامون (سكر بيني وزبدة وقرفة)
قبل الفرن:
نسيبها تخمر شوية حوالي نص ساعة (هي هتخمر على ما باقي كمية العجين تتشكل
ندهن الوش بخليط من البيض والمية والفانيليا وبعدين نرش الفطاير بالسكر
التسوية:
– تخبز في فرن سخن من قبل وعلى درجة حرارة متوسطة
***ملحوظة مهمة: لو الفرن حامي وخصوصاً الأفران اللي بتشتغل بالغاز الطبيعي يُفضل نحط صينية فيها مية سخنة على صاجة الفرن من تحت بحيث تكون تحت الفطاير وهي بتتخبز… البخار اللي بيطلع من المية بيرطب جو الفرن وبيساعد انها ماتتحرقش من تحت وبيوزع الحرارة وبيخليها متنشفش.. ولو غاز طبيعي برده تبقى درجة الحرارة أقل من المتوسطة
– أول ما يطلع من الفرن نغطي الفطاير عشان ما تنشفش
***ملحوظة: الفطاير تتشال في الفريزر وهي طازة ونطلعها وقت ما نحتاجها..
وبألف هنا وشفا
No comments:
Post a Comment